У ПРЭЗІДЫУМЕ ВЯРХОЎНАГА САВЕТА СССР
У сувязі з неабходнасцю далейшага павышэння эфектыўнасці барацьбы з п’янствам і алкагалізмам Прэзідыум Вярхоўнага Савета СССР выдаў Указ «Аб адказнасці за самагонаварэнне», згодна з якім выраб або захоўванне без мэты збыту самагону ці іншых моцных спіртных напіткаў дамашняга вырабу вядзе да штрафу ў памеры ад 100 да 300 рублёў.
КМК: ШТО ЗА НАЗВАЙ?
Нядаўна ў раён прыйшла радасная вестка: камсамольска-маладзёжнаму калектыву цэха па пашыве лёгкіх жаночых сукенак Браслаўскага РКБА прысвоена ганаровае званне «Камсамольска-маладзёжны калектыў — калектыў камуністычнай працы».
ПАКУЛЬ «НЕСУНАМ» ПРЫВОЛЬНА
Вельмі яшчэ жывучыя такія агідныя праяўленні, як прагнасць, сквапнасць, жаданне пажывіцца за чужы кошт, а таму распаўсюджаным відам непрацоўных даходаў з’яўляецца дробны крадзеж. У нашым раёне хціўцы «цягнуць» практычна ўсё. Асабліва ласыя яны на мяса-малочныя і хлебаулачныя вырабы, насенне, кармы і ўгнаенні, будаўнічыя матэрыялы. За пяць месяцаў гэтага года затрыманы з крадзенымі каштоўнасцямі 50 чалавек.
ПАРУШАЛЬНІКІ ПРЫЦЯГНУТЫ ДА АДКАЗНАСЦІ
Адміністратыўная камісія райвыканкама і камісія садзейнічання выканкаму райсавета народных дэпутатаў за неаднаразовыя парушэнні веруючымі заканадаўства аб культах, якія выражаліся ў арганізацыі рэлігійных шэсцяў з песнапеннямі па вёсках Ахрэмаўцы і Азяраўцы, прыцягнулі да адміністрацыйнай адказнасці чатырох жыхароў гэтых населеных пунктаў.
ДЛЯ ЗРУЧНАСЦІ ТУРЫСТАЎ
Вялікай папулярнасцю ў турыстаў і адпачываючых карыстаецца стаянка ў маляўнічым урочышчы «Окменіца». Сёлета тут адкрыецца пункт пракату, дзе можна будзе ўзяць у часовае карыстанне лодку, рыбалоўныя прылады, палатку, паходны посуд. На тэрыторыі стаянкі ўзводзяцца летнія домікі, абсталёўваюцца пляж, спартыўная і дзіцячая пляцоўкі, крынічка гаючай вады.
ПАРТЫЗАНСКІМІ СЦЯЖЫНКАМІ
Навучэнцы Друйскага СПТВ-172 пабывалі ў паходах па месцах баявой славы. Сярод іх — браслаўскія і расонскія хлопцы, таму ім цікава было пазнаёміцца з партызанскай гісторыяй Браслаўшчыны і Расоншчыны. Будучыя воіны прайшлі партызанскімі сцежкамі замошскіх лясоў, усклалі кветкі да помніка юнай гераіні Олі Максімовіч, схілілі галовы перад мемарыялам у Браславе. Потым краязнаўцы наведалі Расонскі музей баявой славы, школу імя П. М. Машэрава.
УВАГА — ВОПЫТ!
Намнога хутчэй растуць племянныя цялушкі на пашы ў Шаўлянах, чым маладняк, які ўтрымліваецца на іншых фермах. Тут яны круглыя суткі на пашы — у простай і зручнай перасовачнай клетцы-загоне з жалезных прутоў, што па заказе калгасных спецыялістаў змайстравалі ў райаграпрамтэхніцы. Трактарам яе перамяшчаюць па полі. Не трэба ні траву касіць, ні вазіць корм, ні нават пасвіць жывёлу — выдатная знаходка.
АМАТАРЫ ПЕСНІ
Змешаная вакальная група педага- гічнага калектыву Відзаўскага СПТВ-169 прыняла сёлета актыўны ўдзел ва Усесаюзным фестывалі самадзейнай народнай творчасці. Аматары песні паспяхова выступілі на занальным і заключным аглядах раённай самадзейнасці, атрымалі права ўдзельнічаць у раённым фестывалі «Браслаўскія зарніцы».
СА ШКОЛЫ — НА ФЕРМУ
Працаўнікі фермы «Гушчына» задаволены, што сёлета старшакласніцы — дзеці калгаснікаў, спецыялістаў — пайшлі на такі дастойны ўчынак: летнія канікулы прысвяцілі ферме. Дарослыя спадзяюцца, што вучні палюбяць гэтую справу і пасля заканчэння школы не развітаюцца з родным калгасам.
ЗАНЯТКІ ІНДЫВІДУАЛЬНАЙ ПРАЦОЎНАЙ ДЗЕЙНАСЦЮ
З 1 мая гэтага года дзейнічае Закон «Аб індывідуальнай працоўнай дзейнасці». У фінансавы аддзел райвыканкама ўжо звярнуліся 15 браслаўчан, якія выбралі адпаведныя пасведчанні. Два чалавекі аформілі патэнт на музычнае абслугоўванне вяселляў. Папулярныя ў браслаўчан такія віды дзейнасці, як вязанне шапак, шкарпэтак, рукавіц з трусінага пуху і з сінтэтычных нітак, бляшаны промысел, пляценне кошыкаў, выраб штучных кветак і вянкоў, кравецкія паслугі.
ЯК НА БЯЗЛЮДНЫМ ВОСТРАВЕ
Менавіта так адчуваюць сябе сёння жыхары вёскі Плюсы і навакольных хутароў. Яны не ведаюць, што робіцца ў свеце, не чуюць пазыўных Масквы і Мінска: хутка месяц, як замаўчалі радыёкропкі. Ды і тэлефонная сувязь паводзіць сябе не лепш. Звярталіся ў бюро рамонту раённага вузла сувязі, але там, відаць, яшчэ не разумеюць, што настаў час скіроўвацца ў магутнае рэчышча сапраўднай перабудовы і працаваць па-новаму.
АБ’ЯВА
Раённая нарыхтоўчая кантора купляе ў насельніцтва ў неабмежаванай колькасці лекавыя травы: корань аіра, грыб чагу, кветкі бессмяротніка, зверабой, ліст крапівы, маці-і-мачыху, кветкі піжмы, падарожнік, тысячаліснік, чараду, багульнік, кару дуба, крушыны, івы, якія будуць атаварвацца закатачнымі крышкамі.
■ Старонкі газеты гартала Жанна БЯЛЬКО.
