Калі краіны СНД і іх праваахоўнікі будуць разам, то ніякія каляровыя рэвалюцыі і іншыя мяцяжы ім не страшныя. Пра гэта Прэзідэнт Беларусі Аляксандр Лукашэнка заявіў на сустрэчы з удзельнікамі пасяджэння Савета міністраў унутраных спраў СНД.
Кіраўнік дзяржавы адзначыў, што на маючым адбыцца пасяджэнні Савета міністраў унутраных спраў СНД адной з важных тэм вызначана святкаванне 80-годдзя Перамогі ў Вялікай Айчыннай вайне. «Дзень Перамогі – самая памятная і ўрачыстая дата ў нашай агульнай гісторыі, – падкрэсліў ён. – Яна сімвалізуе адзінства і мужнасць савецкіх народаў перад тварам фашызму – страшэннай пагрозы ўсяму чалавецтву».
І наконт гэтага сцвярджэння ў краінах СНД няма ніякіх разыходжанняў, заўважыў Прэзідэнт. «Усе народы Савецкага Саюза ваявалі і тысячамі гінулі на франтах. Больш за тое, народы Цэнтральнай Азіі далі прытулак тысячам і мільёнам грамадзян тых тэрыторый, якія былі акупіраваны ў першыя гады фашыстамі», – сказаў беларускі лідар.
Аляксандр Лукашэнка таксама нагадаў, што ў гэтым годзе адзначаецца 80-годдзе вызвалення Беларусі ад нямецка-фашысцкіх захопнікаў. Дата 3 ліпеня, калі была вызвалена сталіца краіны Мінск, выбрана на рэферэндуме для святкавання галоўнага нацыянальнага свята – Дня Незалежнасці. Па выніках пасяджэння форуму кіраўнікоў МУС у Мінску плануецца прыняць заяву Савета міністраў унутраных спраў. Яна, паводле слоў Прэзідэнта, стане не толькі данінай памяці дзясяткам мільёнаў ваеннаслужачых і мірных савецкіх грамадзян, якія загінулі дзеля таго, каб жылі цяперашнія пакаленні. «Гэта будзе зварот да наступных пакаленняў з заклікам свята берагчы гістарычную памяць і, галоўнае, праўду пра страшэнную вайну. Ніколі не забываць, што мы – нашчадкі Пераможцаў, і гэта вялікі наш здабытак», – заявіў Аляксандр Лукашэнка. Прэзідэнт у сувязі з гэтым звярнуў увагу, што пры адзінстве па такім важным пытанні, як святкаванне 80-годдзя Перамогі, у краінах Садружнасці, тым не менш, бываюць рознагалоссі па іншых пытаннях. Таму Аляксандр Лукашэнка заклікаў усе бакі, і праваахоўнікаў у тым ліку, захоўваць адзінства дзеля забеспячэння бяспекі і стабільнасці ў рэгіёне. «Давайце будзем сур’ёзна дзейнічаць па асноўных напрамках работы міністэрстваў унутраных спраў. Яны дакладна выкрышталізаваны жыццём, яны вызначаны, і вось там трэба прымаць нам рашэнні. Калі мы прынялі рашэнне, давайце ў гэтым напрамку будзем дзейнічаць усе разам», – сказаў ён. ■
Паводле матэрыялаў БелТА.
