Наперадзе Беларусі давядзецца перажыць складаны час, бо электаральная кампанія – гэта заўсёды поле бою. Пра гэта Прэзідэнт Беларусі Аляксандр Лукашэнка заявіў 26 верасня, прымаючы кадравыя рашэнні.
Гаворачы пра асноўныя задачы на будучы перыяд для кіраўнікоў мясцовых органаў улады, кіраўнік дзяржавы падкрэсліў, што ў сваёй краіне яны нікога не павінны баяцца. «У вас не павінна быць ніякага сумнення, што мы не проста прарвёмся, мы зробім усё тое, што павінны зрабіць. Людзі нам вераць, давяраюць, і мы не павінны падмануць спадзяванні», – звярнуў увагу Прэзідэнт.
Аляксандр Лукашэнка папярэдзіў, што краіну чакае складаны час у сувязі з маючымі адбыцца выбарамі: «Электаральная кампанія – заўсёды фронт, гэта заўсёды поле бою». І не варта думаць, што ў Беларусі, як некаторыя гавораць, правялі нейкую «зачыстку». «Збеглі (тыя. – Заўвага БелТА), каго трэба было чысціць, – адзначыў Прэзідэнт. – Але гэта іх права выбару, няхай. Збеглі, дык збеглі. Але расслабляцца не трэба». Вядома, да маючай адбыцца палітычнай кампаніі краіна падыходзіць не такой, як раней. «Сітуацыя змянілася, час іншы. У нас – ва ўлады – пазіцыі зусім іншыя, – звярнуў увагу кіраўнік дзяржавы. – Але вы ж разумееце, што і па той бок барыкад гэта разумеюць. І калі такая сітуацыя, да гэтай сітуацыі яны шукаюць ключы».
Прэзідэнт падкрэсліў, што асабіста ён і іншыя афіцыйныя асобы пастаянна інфармуюць грамадства пра тое, што адбываецца ў краіне, не ўтойваючы ад людзей ключавыя факты і рашэнні.
Аднак, паводле яго слоў, тыя, хто збег з краіны, па-ранейшаму выношваюць планы па дэстабілізацыі абстаноўкі ў Беларусі. «І крайні варыянт (які ў іх цяпер застаецца. – Заўвага БелТА) – узброенае ўварванне на тэрыторыю Беларусі. Гэта іх крайні варыянт. Чаму? Таму што грошы ніхто не дае на балбатню. Так, яны там балбочуць… Трыццаць першы год шукаюць мае грошы за мяжой, ніяк не могуць знайсці. Хоць усё вельмі проста – усё ў руках амерыканцаў, нашых “лепшых сяброў”. Калі б нешта было, даўно ўжо вывалілі б», – адзначыў Аляксандр Лукашэнка.
Ён падкрэсліў, што збеглыя проста мелюць языком, цалкам прайграючы і міжнародны, і ўнутраны парадак дня беларускім журналістам. Гэта бачаць і разумеюць у тым ліку іх спонсары з ЗША, а таму пачынаюць патрабаваць больш рашучых дзеянняў у абмен на фінансаванне. ■
Паводле матэрыялаў БелТА.
