Прэзідэнт Беларусі Аляксандр Лукашэнка назваў задачы для фарміравання новай архітэктуры еўразійскай бяспекі і ўмацавання АДКБ. Адпаведныя заявы ён зрабіў у сваім выступленні ў Астане на саміце АДКБ.
Па-першае, Аляксандр Лукашэнка лічыць неабходным узмацніць узаемадзеянне міжнародных арганізацый, якія працуюць на еўразійскай прасторы. «У сувязі з гэтым прапаную прапрацаваць пытанне пра арганізацыю сустрэчы вышэйшых службовых асоб рэгіянальных арганізацый АСЕАН, АДКБ, ШАС, СНД, НУМДА, Савета супрацоўніцтва краін Персідскага заліва», – сказаў ён.
Прэзідэнт адзначыў, што ўжо ёсць апрабаваны механізм рэгулярных сустрэч кіраўніцтва АДКБ, СНД і ШАС. «Чаму не паспрабаваць пашырыць гэты фармат з мэтай абмену ўнікальным міжрэгіянальным вопытам? Гатовы гэту сустрэчу правесці ў Беларусі пры вашай згодзе», – заявіў Аляксандр Лукашэнка.
Па-другое, у рамках АДКБ, лічыць Прэзідэнт, наспела неабходнасць сур’ёзна заняцца пытаннямі штучнага інтэлекту і паглыбіць супрацоўніцтва ў сферы інфармацыйнай бяспекі. «Ідэя не новая. Аднак практычныя крокі ў рамках Арганізацыі мы пакуль не пачалі. У той час як краіны Захаду ўжо на ўсю моц займаюцца гэтай праблемай, – сказаў Аляксандр Лукашэнка. – Трэба таксама падумаць над тым, як павысіць практычную аддачу ад Пагаднення 2017 года пра супрацоўніцтва дзяржаў – членаў АДКБ у галіне забеспячэння інфармацыйнай бяспекі. Мы павінны ісці ў нагу з імклівым развіццём кібертэхналогій, каб эфектыўна рэагаваць на выклікі і пагрозы бяспецы нашых краін у гэтай сферы».
Трэцяя задача датычыцца забеспячэння рэжыму кантролю за новымі тыпамі зброі, якія з’яўляюцца. «У нас на парозе стаяць новыя смяротныя тыпы зброі, здольныя знішчыць усё чалавецтва. Гэты арсенал папоўнілі ўжо лазерныя, гіпергукавыя, квантавыя, электрамагнітныя і іншыя перадавыя распрацоўкі», – канстатаваў кіраўнік дзяржавы.
«На нашу думку, АДКБ можа і павінна стаць у авангардзе дзейнасці па стварэнні агульнага дагаворна-прававога механізма, які дае магчымасць у будучыні забяспечыць рэжым кантролю за такім узбраеннем. Гэта трэба рабіць ужо цяпер. Прынамсі, пачынаць», – выступіў з ініцыятывай Аляксандр Лукашэнка. ■
Паводле матэрыялаў БелТА.
