Прэзідэнт Беларусі Аляксандр Лукашэнка 5 чэрвеня правёў у Іркуцку сустрэчу з губернатарам Іркуцкай вобласці Расіі Ігарам Кобзевым.
Кіраўніка беларускай дзяржавы ля будынка Урада Іркуцкай вобласці сустракалі з хлебам-соллю і народнымі песнямі. Разам з губернатарам да Аляксандра Лукашэнкі выйшлі ветэраны вайны і працы, артысты фальклорнага ансамбля Іркуцкага таварыства беларускай культуры і народнага фальклорнага ансамбля «Абярэг» Іркуцкага абласнога Дома народнай творчасці.
«Ведаю, што вы даўно жадалі наведаць Байкал. У верасні 2020 года (у гэты час Ігар Кобзеў наведваў з рабочым візітам Рэспубліку Беларусь. – заўвага БелТА) вы сказалі, што зробіце гэта абавязкова. Дзякуй, што стрымалі сваё слова», – сказаў кіраўнік расійскага рэгіёна.
Ігар Кобзеў праінфармаваў Прэзідэнта Беларусі пра магчымасці рэгіёна і яго прамысловы патэнцыял. Ён спыніўся на эканоміцы вобласці і расказаў пра рэалізацыю буйнейшых інвестыцыйных праектаў.
«Нам сёння патрэбна і неабходна прысутнасць нашых братоў, калег і партнёраў. Мы заўсёды адкрыты», – сказаў губернатар.
Пасля сустрэчы з Ігарам Кобзевым Аляксандр Лукашэнка пагутарыў з мясцовымі жыхарамі: гараджане сабраліся ля ганка і чакалі Прэзідэнта Беларусі. Як аказалася, у многіх з іх сваякі пражываюць у нашай краіне.
«Прыязджайце часцей», – папрасілі іркуцяне, робячы памятныя фатаграфіі з беларускім лідарам.
Затым кіраўнік дзяржавы накіраваўся на Іркуцкі авіяцыйны завод.
Беларусь і Іркуцкая вобласць маюць даўнія і трывалыя ўзаемаадносіны. Гэты расійскі рэгіён з’яўляецца для Беларусі даўнім і важным партнёрам як у гандлі, так і ў інвестыцыйнай і культурнай сферах.
Як вядома, Беларусь і Расія асаблівую ўвагу ўдзяляюць развіццю ўласнага авіябудавання. Перад расійскай авіябудаўнічай галіной стаіць задача рэалізаваць маштабныя праекты па нарошчванні аб’ёмаў выпуску суднаў грамадзянскай авіяцыі. Прадпрыемствы Беларусі даўно падключыліся да рэалізацыі гэтай задачы, яны дапамагаюць з пастаўкамі авіяцыйных кампанентаў, вузлоў і агрэгатаў.
Сярод іншых сфер узаемадзеяння – лясная гаспадарка і будаўніцтва. Акрамя таго, для Іркуцкай вобласці могуць уяўляць цікавасць беларускае горна-шахтавае абсталяванне і кар’ерная тэхніка, грузавыя аўтамабілі, пасажырскі транспарт. ■
Паводле матэрыялаў БелТА.
